Søgan
Filadelfia er ein hvítusunnusamkoma, ið hevur sínar røtur heilt aftur til 1905 í Los Angeles, har Heilagi Andin fall yvir mong trúgvandi, ið longdust eftir Gudi.

   Her í Havn búði ein einkja, Petra Andersen, f. Guttesen, ið hevði verið gift við einum norðmanni. Hesin arbeiddi í kolanáminum í Hvalba, hagar hann var komin, aftan á at hann nærum var gingin burtur við saltdampara. Petra var longu tá einkja eftir ein hvalbing, sum hon átti eina dóttur við. Petra fekk eina dóttir saman við norðmanninum. Seinni fluttu Petra og maðurin saman við báðum døtrunum til Noregs at búgva. Stutt eftir, at tey vóru komin til Noregs, doyði maðurin, og Petra sat einsamøll á øðrum sinni við tveimum døtrum í fremmandum landi. Av tí at hon kendi Jesus framman undan, visti hon, hvar hon kundi søkja hjálp í stóru sorg og einsemi sínum. Henni longdist eftir kraft til at liva lívið víðari og fór tí á møtir og kom soleiðis í samband við "pinsavekingina". Hesi møtini vóru øðrvísi og full av kraft, men "kraftina" upplivdi hon ikki har. Komin aftur til Føroya á sumri 1924 byrjaði hon saman við øðrum havnarfólkum, ið longdust eftir meira av Jesusi, at hava bønarmøtir í heimunum. Soleiðis legðist spírin til hvítusunnusamkomuna í Føroyum.

   Á einum bønarmøti tann 26. december 1924 varð Petra doypt í Heilaga andanum, og eldurin tók at festa í onnur eisini. Tann 21.juli í 1936 var T.B. Barrat á veg úr Noregi til Íslands at vitja samkomuna har. Á vegnum kom skipið á Havnina, og nýtti T.B. Barrat høvið til at vitja "pinsavinirnar" her, og sama kvøld varð samkoman alment sett á stovn og hvítusunnu-samkoman varð "fødd" við 21 limum. Samkomuvirkið vaks og prædikumenn komu úr Noregi og Danmark at hjálpa til. Samkomuhús varð bygt og nýggj samkoma varð stovnað á Sandoynni. Hesir føroysku hvítusunnupionerarnir eru nú allir heima hjá Harranum, men vit hava enn børn hjá hesum ímillum okkara og rætta tey "stafettkyndilin" víðari til næsta ættarlið. Samstundis sum samkomuvirkið hjá hvítusunnuvinunum mentist, stungu ymiskir trupulleikar seg upp, sum ikki skal verða nevnt meira um her, men hetta førdi við sær, at Filadelfia samkoman varð stovnað í 1972, og flutti hon inn í nýtt høli á Landavegnum 22 árið eftir.

Leiðslan í Filadelfia
Samkoman hevur eina leiðslu, sum pastoral leiðaraskap. Leiðslan er skipað við einum pari, sum ofta verður kallað fyristøðupar; hesi eru ikki yvir hinum limunum í leiðarabólkinum, men tey skipa fyri tí dagliga virkseminum í samkomuni í samstarvi við leiðsluna. Dentur verður lagdur á, at tann og tey, sum eru leiðarar, mugu vera fyrimyndir í gerandisdegnum. Soleiðis eru samkomuleiðarar ongantíð stjórar í eini fyritøku, men tænarar í eini Harrans samkomu. Leiðslan hevur til uppgávu at síggja til at samkomulimirnir hava verju í form av forbøn og at vegleiða og leiða. Aftrat sær hevur so leiðslan fleiri samkomutænarar, sum hava ábyrgd fyri tiltøkum og aktivitetum í samkomuni. Tummas og Sólrún Jacobsen eru í løtuni fyristøðupar í Filadelfia, og saman við teimum eru: Anna Guttesen, Sam Jakobsen, Hildibrandur Olsen, Margreth Olsen og Mariann Jacobsen í leiðsluni.

Hvørji eru vit?
Filadelfia er ein hvítusunnusamkoma, sum hevur búleikast á Landavegnum 22, í Havn síðani september 1973.

Hvítusunnusamkoman Filadelfia trýr at

• Tað finst ein sannur Gud, myndaður í trimum persónum: Faðirin, Sonurin og Heilagi Andin.
• Øll menniskju hava syndað og hava frelsu fyri neyðini.
• Ein og hvør kann verða frelstur, við at trúgva á Jesus og biðja Hann um fyrigeving syndanna.
• Jesus bar á krossinum allar syndir og sjúkur okkara, og tessvegna eiga vit at biðja fyri teimum sjúku til grøðing.
• Øll, sum ikki taka við trúnni á Jesus, fara fortapt.
• Samkoman er Guds amboð her á jørð, og at ein og hvør eigur at vera í einari lokalari samkomu.
• Sum Guds fólk eru vit kallað til at liva tann nýggja sáttmálan í kærleika og trúfesti.
• Samkoman skal gera somu verk sum Jesus gjørdi, tá ið hann gekk her á jørð, og at allar náðigávur, sum Bíblian talar um, eru til okkara tíð.
• Dópur í vatni er játtan fyri trúgv og umvending.
• Dópurin er, at tú verður jarðaður fyri at rísa upp aftur til eitt nýtt lív í Kristusi.
• Vatndópurin er ein góð samvitskupakt við Gud og byrjanin til eitt satt lærusveinasamfelag við Jesusi Kristusi.